தீவிரவாதம் சீக்கிரம் அழிந்துவிடவேண்டும் என்று எண்ணாதவர் யார்? எல்லோருக்கும் அவ்வெண்ணம் இருப்பினும் எனக்கு அதன் சதவீதம் சற்று அதிகமே. காரணம் யாதெனக்கேட்டால் அன்றுதானே எழுத்தாளர் பாரா துப்பாக்கிகள், தோட்டாக்கள், பதுங்கு குழிகள் சதித்திட்டங்கள் மற்றும் அவைசார்ந்த இன்னபிற வஸ்துக்களை அறவே அப்புறப்படுத்திவிட்டு அவரின் பிரத்தியேக ஸ்டைலில் எழுதும் மற்ற நாவல்கள், சிறுகதைகள் மற்றும் எக்ஸலண்ட் போன்ற புத்தகங்களை நாம் தடையின்றி படிக்க முடியும்.!

சுயமுன்னேற்றப்புத்தகங்களின்பால் எனக்கிருந்த காதலெல்லாம் கல்லூரி முடிந்த ஒரு வருடத்தில் காணமற்போயிற்று. ஆனால் இவ்வருட துவக்கத்தில் பாரா போட்டிருந்த ஒரு பதிவின்போதே எக்ஸலண்ட் பற்றி குறித்துவைத்துக்கொண்டேன். 6 மாதங்கள் கழித்து சென்றவாரத்தில் ஸ்ரீரங்கம் யானைகட்டிச் சத்திரத்தில்தான் விமோசனம் ஆனது.

சுயமுன்னேறமா! என்று முகம் சுளிப்பீராயின் கவலைப்படேல். தனித்தனியாக வெவ்வேறு பெர்ஸனாலிட்டிகளைப்பற்றிய சுவாரசியமான புத்தகமாகவும் இதனை எடுத்துக்கொள்ளலாம். பாராவின் குடும்ப டாக்டராகட்டும் இசைஞானி இளையராஜாவாகட்டும்,அவர்களிடத்திலிருந்த எந்த திறன் அவர்களை இந்த உயரத்திற்கு இட்டுச்சென்றிருக்கும் என்று ஆசிரியர் யோசிக்க ஆரம்பித்திருக்கிறார்.

இரண்டு குழந்தைகள் நல மருத்துவர்கள். பாராவின் குடும்ப டாக்டர்கள். இருவருமே நகரின் நல்ல மருத்துவர்கள். ஒருவர் மிக கனிவானவர். மற்றொருவர் சற்றே சிடுமூஞ்சி. ஆனால் பாராவின் 5 வயது மகளுக்கு சிடுமூஞ்சி டாக்டரைதான் மிகவும் பிடித்திருக்கிறது. ஏன்? அங்கேதான் உன்னதத்தின் சூட்சுமம் ஒளிந்துகிடக்கிறது என்கிறார் ஆசிரியர்.

 இளையராஜா சிறந்த இசையமைப்பாளர் மட்டுமல்ல. உன்னதமான இசையமைப்பாளர் என்பதற்கு ஆகச்சிறந்த உதாரணம் ஒன்றைக்கொடுக்கிறார். அது உதாரணம் மட்டுமல்ல அந்த நிகழ்வு இல்லாது அந்த புத்தகமே முழுமையடையாது என்றும் எண்ணுகிறார். அது அப்படியே உண்மை. ஹேராம் திரைப்படம் தொடர்பான அந்த வெகு சுவாரசியமான நிகழ்வு என்ன என்பதை நீங்கள் கட்டாயம் அறிந்துகொள்ள வேண்டும். அது உங்கள் சுயத்தினை முன்னேற்றுமா என்பதில் கவலை கொள்ளேல். அது சுயத்தை மகிழ்வுபடுத்தும். கட்டாயம் உத்வேகம் கொடுக்கும். அது போதும்.

கல்கி.கி.ராஜேந்திரன் அவர்களின் சித்திரகுப்தன் பேரேடு, விஸ்வநாதன் ஆனந்த்தின் தன் தவறுகளையும், மாற்றான் தவறுகளையும் மட்டுமே குறிப்பெடுத்துக்கொள்ளும் விர்சுவல் டேட்டாபேஸ், யானியின் லிட்டரலி தன்னையே உருக்கி இசை செதுக்கும் ஜாலம், எழுத்தாளர் ஜே.எஸ்.ராகவன் அவர்களின் செய்நேர்த்தி, ஜி.வி.ஐயர் என்கிற டைரக்டரின் குணாதிசியங்கள், பின்லேடனின் கர்மயோகம், காந்தி என்கிற உன்னதத்தின் உச்ச நட்சத்திரம் ஆகியவற்றோடு பாரா என்கிற என்ஜினியரிங் மாணவன் தேங்காய் உரிக்கும் மெஷின் கண்டுபிடிக்க முயற்சித்த கதையும் உண்டு.

நான் ஏற்கனவே சொன்னதுபோல இதனை சுயமுன்னேற்றப்புத்தகம் என்று கருதி வாங்காமல் இருக்கும் அன்பர்கள், தைரியமாக அந்த அஸ்பெக்ட்ஸ் தவிர்த்து மற்ற சுவாரசியமான விஷயங்களை பாராவின் எளிய அருவி போலோடும் தமிழில் படிக்க ஒரு அருமையான வாய்ப்பு

சுயமுன்னேற்றப்புத்தகம் என்றும் பார்த்துப் படிப்பவர்களுக்கு இது உண்மையான பொக்கிஷம். என் சுயத்தை மிகவும் மகிழ்வித்த புத்தகம்.

புத்தகம் : எக்ஸலன்ட்  ஆசிரியர் : பா.ராகவன்  பதிப்பகம் : கிழக்கு பதிப்பகம் விலை : 70 ரூபாய்

(இடையில் ஏற்பட்டுவிட்ட ஒரு எதிர்பாராத பயணத்தின் காரணமாக மிகத் தாமதமாக பதிவேற்றம் செய்யப்படுகிறது.)

பதிவர் சந்திப்புகள் ஒன்றிலும் நான் இதுவரையில் கலந்துகொண்டதில்லை. ஆர்வம் நிறைய இருந்தது. ஆனால் பயணம்,நிகழ்வுக்கான நேரம் ஆகியவற்றில் இருந்த சிக்கல்கள் காரணமாக தள்ளிப்போய்க்கொண்டே இருந்தது. புதிய பதிவர்கள் அழைத்திருக்கிறார்கள் போகலாமா என்று குசும்பன் (என்றும் அழைக்கப்படுகிற சரவணன் ) கேட்டபோது மகிழ்வோடு ஒத்துக்கொண்டேன்.

 சுற்றிலும் வேப்பமரங்கள் அடர்ந்த புல்வெளியில் கராமா பார்க்கில் நிகழ்ந்த்து சந்திப்பு. அருகிலேயே வசிக்கும் திரு.சுந்தர் வலைப்பதிவு கூட்டத்திற்கெனவே பிரத்தியேகமாக எடுத்துவைத்திருந்த மசால்வடையும் சாஸீம் இன்னும் வெகுகாலத்திற்கு நினைவில் நிற்கும்.

 புதிய பதிவர்கள், தொடர் வாசகர்கள், ஆசாத் பாய், லியோ சுரேஷ், குசும்பன் மற்றும் அய்யனார் ஆகிய மூத்த பதிவர்கள் என ஒரு சுவாரசியமான உரையாடல் களமாக அமைந்த்து கூட்டம்.

தமிழ் திரட்டிகள் சிலவற்றினை வலைப்பதிவில் இணைப்பதின் மூலமாக வலைப்பதிவு ஒட்டுமொத்தமாக காணமல்போய்விடுவதாகத் தொடங்கியது பேச்சு. பதிவர் கெளதமின் பழைய பதிவில் ஒரு திரட்டியினை இணைத்தன் காரணமாக பதிவு ஒட்டுமொத்தமாக காணாமற்போய்விட்ட்தாகவும் தன்னால் அதனை மீட்க முடியாமற்போனது பற்றியும் பேசினார். இதனைப்பற்றிய awareness வலையில் பரப்புதல் நலம் என்றும் முடிவு செய்யப்பட்ட்து.

திரட்டிகளில் சிறந்த்தாக தமிழிஷ் விளங்குவதாக புதிய பதிவர்கள் அனைவரும் ஒத்துக்கொள்கின்றனர். இடையே பேசிய ஆசாத்பாய் தமிழ்மணம் வலைப்பதிவுகளின் ஆரம்பகட்ட்த்திலிருந்து செய்திருக்கும் சேவையைப்பற்றி எடுத்துரைத்தார்.

கண்ணா,செந்தில்,கலையரசன் ஆகியோருக்கான வலைப்பதிவு பற்றிய உரையாடலில் பின்னூட்டங்கள் எப்படி வருகின்றன, பொதுவான பின்னூட்ட உத்தி என்ன என்பது குறித்த சுவாரசியமான (ஆனால் எழுத்தில் கொண்டு வரமுடியாத) உரையாடல் நிகழ்ந்த்து. மூத்த பதிவரான ஆசாத் பின்னூட்டங்களை கருத்தில் கொண்டு எழுதுதலை விட எழுதும் விஷயத்தில் (content) ஆர்வம் செலுத்துமாறு கேட்டுக்கொண்டார்.

உரையாடல் நிகழ்ந்துகொண்டிருக்கையிலேயே அய்யனாரின் வேண்டுகோளின்படி எல்லோரும் அவரவர்களின் வலைப்பதிவு விபரங்கள், பிறந்த ஊர் தொடர்பான விபரங்களை பகிர்ந்துகொண்டோம்.

பதிவர் சுந்தர் அவர்கள் கர்நாடக இசை பற்றிய பேச்சு வந்தபோது ‘அருணா சாய்ராம்’ அவர்களின் சுவாரசியமான வாழ்க்கைக்குறிப்பு ஒன்றை வழங்கினார். தான் ஒரு பழையதுபாய்வாசி என்றும் என் பேச்சில் துபாயின் குறைகளைவிட நிறைகளே அதிகம் தொனிக்கும் என்று கூறினார். மிகுந்த அனுபவசாலிகளிடம் கேட்டுக்கொள்ள நிறைய இருப்பதை அவரது பேச்சு முற்றிலும் உணர்த்தியது.

திரு.அஷோக் என்னும் நண்பர் கலந்துகொண்டிருந்தார். பதிவுகளை தொடர்ந்து படித்து வருபவரான அவரை ஆசாத் பாய் எங்களுக்கு அறிமுகம் செய்து வைத்தார். அவர் ஒவியரும் ஒரு சோஷியலிஸ்ட்டும் ஆவார். நிறைவாகப்பேசினார். வழக்கமான கும்மிகளை விட்டு பதிவுலகம் சற்றே தன்னை மெருகேற்றிக்கொள்ள் வேண்டும் என்னும் அவாவை வெளிப்படுத்தினார்.

திரு.ஆசாத் அவர்களின் தீவிர வாசகனாகிய எனக்கு அவருடனான முதல் சந்திப்பு பெரிதும் உபயோகம் மிக்கதாகவும், மிகுந்த வாஞ்சையுடன் சக மனிதர்களை அவர் அணுகும் பாங்கினை நினைத்து மகிழ்வதாகவும் அமைந்த்து. தன்னுடைய புத்தகங்கள் பற்றியும், வலையுலகில் தன்னுடைய எழுத்துக்கள் பற்றியும் சிறப்பாக பேசினார். அவருடைய ஆங்கில விமர்சன்ங்க்ள்தான் எனக்கு ஆங்கில புத்தகங்கள்பால் ஆர்வத்தினை கொண்டுசென்றன என்று கூறினேன். தொடர்ந்து தான் அதில் கவனம் செலுத்தப்போவதாகக் கூறினார்.

லியோ சுரேஷ் தனது வலையுலக அனுபவங்களை பகிர்ந்துகொண்டார். உலக அரசியல் பற்றிய தெளிவான பார்வை அவருக்கு இருக்கிறது. லெபனான் தேர்தல் பற்றியும், துபாயிலிருந்து லெபனானுக்கு பயணிக்கும் லெபானியர்களின் எண்ணிக்கையையும் அதன் பின்னணியிலான ‘திருமங்கலம் தேர்தல்’ பாணி அரசியலையும் விவரித்தார்

அய்யனார் தனது பேச்சில் வழமையான கொண்டாட்டத்துடன் ஆரம்பித்தார். பொறுப்புள்ள வாசகனை உருவாக்கும் தமிழ்சூழலும், வலையுலகும் உருவாக வேண்டும் என்பதே அவரது பேச்சின் அடிநாதமாக இருந்த்து.

குசும்பனுக்கு மட்டும் பின்னூட்டங்கள் வானளாவ உயர்ந்துகொண்டுபோவதைப்பற்றி அனைவரும் கேட்க முயன்றபோது, ’ராசாவுக்கு பால் ஊற்றிய கதையை’ மேற்கோள் காட்டி தனது வழக்கமான பாணியில் சிரிக்க வைத்தார். பதிவு துவங்கிய நாளிலிருந்து தான் comment moderation வைத்திருந்திருக்கவில்லை என்றும், தனது பதிவுக்கு வரும் அத்தனை பதிவர்களின் ஒத்துழைப்பும் அதற்கு காரணம் என்றும் கூறினார். சமீப நாட்கள் ஒன்றில் ஒரு தவிர்க்கமுடியாத சூழலில் ஒரே ஒரு நாள் CM பயன்படுத்த நேர்ந்த சம்பவத்தையும் கூறினார்.

நண்பர் உடுமலைப்பேட்டை நாகு தனக்கென தனி வலைப்பதிவு இல்லையெனினும் ஒரு தேர்ந்த வலைப்பதிவர் போலவே அனைத்து பதிவுகளையும் படித்து தெளிவாக பேசினார். பதிவு ஆரம்பித்து சில நாட்களிலேயே குங்கும்ம் வார இதழில் இடம்பெற்ற பதிவரான கெளதம் தனது பதிவுலக அனுபவங்களை பேசினார்.இந்த கூட்டம் முழுவதுமே உற்சாகம் கொப்புளிக்க கருத்துக்களை எடுத்து வைத்துக்கொண்டே இருந்தார் கலையரசன். நண்பர் செந்தில் (நட்பு வட்டாரத்தில் நோக்கியா செந்தில் என்பது இவர் பெயராம்) கொங்கு தமிழில் பேசுகிறார். சொல்ல வந்த கருத்துக்களை அவரது வலைப்பதிவில் உள்ளது போலவே அழகுற இயம்புகிறார். இந்த வலைப்பதிவர் கூட்ட்த்தினை ஒருங்கிணைத்த்தில் முன்னின்று செயல்பட்டவர் கண்ணா. ஒட்டுமொத்தமாக இந்த இளைஞர்கள் இந்த கூட்ட்த்தினை முன்னின்று நட்த்திய பாங்கும், அவர்களின் அன்பும் என்றும் மறவாதது.

 கூட்டம் முடிந்து ஆசாத்பாய் அவர்களுடன் நிகழ்ந்த உரையாடல், அய்யனாரின் கைபேசி வழியே ஒலித்த சூபி பாடல்கள், கலீல் கிப்ரான் பற்றி அறிந்துகொண்ட தகவல்கள், துபாயில் கவ்வாலி கச்சேரிகள் என இன்னும் ஒரு முழுப்பதிவு தாங்கும் விஷயங்களுடன் இனிதே நிறைவு பெற்றது சந்திப்பு.

சந்திப்பு பற்றிய பிற பதிவர்களின் பதிவுகள்

ஆசாத்பாய்   சுந்தர்    கண்ணா    கலை  வினோத் கெளதம்

2558 ஓட்டுக்கள் மட்டுமே பெற்று திருச்சி மக்களவைத்தொகுதியில் டெபாசிட் இழந்த லதிமுக வேட்பாளர் மன்சூர் அலிகானின் தேர்தல் பிரச்சார சுவரொட்டிகள் இரண்டு.

’முரளி கடையில ஒரு காபி சாப்பிட்டு போயிடலாம் தம்பி’. கிடைக்க கடினமான ஒரு முக்கியமான டாக்டர் அப்பாயின்மெண்ட்டிற்காக விடியற்காலையில் புறப்பட்ட நேரத்தில் ஆட்டோக்காரனிடம் அப்பா மேற்கண்ட வாக்கியத்தை சொன்னவுடன் சற்றே கோபம் வந்தது முதலில். ஆனால் அந்த நொடியில் நினைத்திருக்கவில்லை ஒவ்வொரு முறையும் அந்த கடையை எவ்வளவு அவசரமாய் கடந்து சென்றாலும் நிதானித்து ஒரு காபி சாப்பிடமால் போவதில்லை என்பதை.

ஸ்ரீரங்கம் ராஜகோபுரத்திற்கு வெகு அருகே அம்மாமண்டபம் சாலையையும், காந்தி சாலையயும் இணைக்கும் முனையில் பெயரிடப்படாமல் அமைந்திருக்கிறது அந்த கடை. மிகவும் சிறிய கடைதான். வேறு எந்த பதார்த்தங்களும் கிடையாது. டீ, பால் கூட கிடையாது. காஃபி மட்டும்தான். அதுவும் சாதாரண காஃபி அல்ல.  ஆகச்சிறந்த காபி.  ஆறு ரூபாய்க்கு ஒரு நாள் முழுதும் மலரவைக்கும் காஃபி.

எப்போதும் கூட்டம் நின்று கொண்டேயிருக்கிறது. முரளி என்பது அந்த கடை முதலாளியின் பெயர். கடைக்கு பெயர் கிடையாது. ஒரு சின்ன போர்ட் கூட கிடையாது. காஃபி 6  ரூபாயிலிருந்து 7 ரூபாயாக மாற்றப்பட்டிருப்பதாக ஒரு சிறிய கருங்கற்பலகை அறிவித்திருந்தது. அவ்வளவுதான்.  ஸ்ரீரங்கத்தின் முக்கியமான தலங்களுக்கு தரிசித்த கையோடு இங்கே தாராளமாக ஒரு ஸ்ட்ராங் காபி குடித்து பயணத்தினை நிறைவு செய்யலாம்.

காஃபி ரசிகர்கள் தவறவிடக்கூடாத ஒரு இடம். முயன்று பாருங்கள்.

முரளி காஃபி கடை -  புகைப்படம் நன்றி -  அபிநந்தனன்

திரு.முரளி

அனேகமாக கெளதம் மேனன் படமாக இருக்கலாம் என்று நினைக்கிறேன். இயக்குனர், மற்ற எந்த விபரங்களும் இல்லாமல் கடந்த வாரம் முழுவதும் வந்துகொண்டிருந்த pre launch விளம்பரங்கள் எல்லாமே பிரமாதமாக இருக்கின்றன. யாராக இருந்தாலும் சின்ன சின்ன விபரங்களை கூட அழகாக பார்த்து வடிவமைத்ததற்கு பாராட்டுக்கள். எனினும் சிம்பு நடிக்கிறார் என்றாலே வரும் final outputபற்றிய பயங்களில்  இருந்து விடுபட முடியவில்லை.

இம்தியாஸ் அலி பற்றிய எனது முதல் பதிவின் முதல் வரி, “வாழ்க்கையை ஒரு கோழி இறகைவிட லேசாக எடுத்துக்கொள்ளும் பெண் ஒருத்தி..” என்று எழுதியிருந்தேன். ‘ஜப் வீ மெட்’ திரைப்படத்திற்கு அத்தனை அழகையும் கொண்டு வந்து கொட்டி அதனை ஒரு அர்த்தமுள்ள திரைக்கதையாக உருவாக்கியிருப்பது காத்ரீனா கைஃ   கரீனா கபூர் அழகுற ஏற்று நிறைவாக நடித்திருக்கும் கீத் என்னும் அந்த கதாபாத்திரம்தான். 

எதைப்பற்றியுமே கவலைப்படாத, அதிகம் அலட்டிக்கொள்ளாத அந்த நொடியை நிறைவாக வாழ்வதைப்பற்றி மட்டுமே கவலைப்படும் கீத் தான் ஜப் வீ மெட் டின் உயிர் நாடி. படம் பார்த்துமுடித்தும் நம்மில் சிலருக்கு அதனை இரண்டாவது முறையும் பார்க்கத்தூண்டுமாயின் அது கீத் தின் கதாபாத்திரம் மட்டும்தான். 

தான் செய்து வந்த தொழிலில் பெருத்த இழப்பு, தன்னை காதலித்த பெண் தன்னை விட்டு வேறொருவனை திருமணம் செய்து கொள்ளல், தந்தையிழந்து தாயின் அரவணைப்பை தேடும் அவனின் அம்மாவோ இன்னொரு பணக்காரனை இரண்டாம் திருமணம் செய்து கொண்டு அவர்களது சொந்த நிறுவனத்தின் பங்குகளை பிரித்துக்கேட்டல் என விரக்தியின் விளிம்பில் இருக்கும் ஆதிதய காஷ்யப் கண்போன போக்கில் போய்க்கொண்டிருக்கும்போது ஒரு ரயில் பயணத்தில் ‘கீத்’ தை சந்திக்கிறான். 

அவளின் ஓயாத பேச்சு ஆதித்யாவை கடும் எரிச்சலுக்குள்ளாக்குகிறது, ஆனால் தவிர்க்கமுடியாதுபோன காரணங்களினால் அவளுடன் கழிய நேர்ந்த ஒரு இரவு அவனுக்கு வாழ்க்கையின் மீதான ஒரு பிடிப்பை ஏற்படுத்துகிறது. நிச்சயம் அவனுக்கு நேர்ந்த துயரங்களைத்தாண்டி அவனால் வெளியே வர முடியும் என்ற எண்ணத்தை கீத் தின் நடவடிக்கைகள் உணரவைக்கின்றன. அவளுடன் அவளது சொந்த ஊரான ஒரு பஞ்சாப் கிராமத்துக்கு பயணிக்கிறான். 

அங்கு கீத் துக்கு திருமண ஏற்பாடுகள் நடைபெற்றுக்கொண்டிருக்கின்றன. ஆனால் கீத் த்துக்கு அனுஷ்மன் என்கிற ஒரு நண்பன் மீது காதல். அவனுடன் சேர்ந்து வாழ வீட்டை விட்டு வெளியேற முடிவு செய்கிறாள். அவளை அனுஷ்மனுடன் கொண்டு சேர்ப்பதற்காக ஆதித்யாவும் அவளுடன் சிம்லா செல்கிறான். 

கீத் வீட்டில் ஆதித்யா,கீத் துடன் ஓடிவிட்டதாக நம்பப்பட்டு துயரம் பரவ, கீத்தை சிம்லாவில் விட்டுவிட்டு தான் விட்டுவிட்ட வாழ்க்கையை செவ்வனே தொடர தனது சொந்த ஊருக்கு பயணிக்கிறான் ஆதித்யா. பெரும் தன்னம்பிக்கையோடும், புத்துணர்ச்சியோடும் தனது தொழிலை, எதிரிகளை, நிறுவனத்தினை, தொழிலாளர்களை, அம்மாவை சந்திக்கிறான். இந்தியாவில் முன்னோடி செல்ஃபோன் நிறுவனமாக தனது நிறுவனத்தை கட்டமைக்கிறான். 

ஆதித்யாவின் பிரபலமான முகத்தினை பின் தொடர்ந்து அவனைக்கண்டுபிடிக்கும் கீத்தின் பெற்றோர் கீத்தை தங்களிடம் ஒப்படைக்குமாறு கேட்கின்றனர். கீத்தை தேடி மீண்டும் சிம்லாவுக்கு பயணமாகும் ஆதித்யாவுக்கு அதிர்ச்சி காத்திருக்கிறது.பிறகு நடப்பதை நீங்கள் திரையில் பார்க்கலாம்.   

ஜப் வீ மெட் திரைப்படம் பார்த்தவுடனேயே அதற்கு ஒரு விவரணை கட்டுரை எழுதி அதில் இம்தியாஸ் அலியை பாலிவுட்டின் ராதாமோகன் என்ற அடைமொழியினை சேர்த்திருந்தேன். அது சற்றே சரியானதும் கூட. திரைப்படம் முழுவதிலும் பளிச்சென சில வசனங்களை மிக அழகியல் ரீதியான காட்சிகளை கோர்த்திருப்பதில்தான் இம்தியாஸ் அலியின் வெற்றி ஒளிந்திருக்கிறது. 

ஆதித்யாவாக நடித்திருக்கும் ஷாஹித் கபூருக்கு தன் திரைப்பட வாழ்க்கையில் மிக முக்கியமான படம் ஜப் வீ மெட். இவ்வளவு அழுத்தமான கதையையும், கதாபாத்திரத்தையும் அவர் ஏற்றதே இல்லை. 

அதே போல கரீனாவும், முன்பு க்ரீனா கதாநாயகி என்றால் சற்று யோசித்துதான் சிடியே வாங்குவேன். இப்படத்தில் அவர் வெளிப்படுத்தியிருக்கும் நடிப்பு absolutely fabulous. 

கண்டிப்பாக ஒரு முறை பாருங்கள்!

வாழ்க்கையை ஒரு கோழி இறகினை விட லேசாக எடுத்துக்கொள்ளும் பெண் ஒருத்தி, நொடிக்கு நொடி முடிவினை, மனதினை மாற்றிக்கொண்டேயிருக்கிற உயர்வகுப்புப் பையன் ஒருவன், ஒரு சிறிய அறைக்குள் இருந்துகொண்டு தனது பெரிய குடும்பத்தினை கட்டிக்காக்கிற ஒரு பஞ்சாபித்தாத்தா, தனது மகன் மனது முதிராமல் செய்துவிட்ட தவறுகளை பெரிதும் அலட்டிக்கொள்ளாது மன்னிக்கிற ஒரு தந்தை இப்படி இம்தியாஸ் அலியின் இரண்டு திரைப்படங்கள், அவரின் ஒரு டஜன் கதாபாத்திரங்கள் எல்லாமே எனது மனதுக்கியைந்தன. 

இம்தியாஸ் அலியின் இயக்கத்தில் இரண்டு திரைப்படங்கள் வெளிவந்திருக்கின்றன. இரண்டு தயாரிப்பில் இருக்கின்றன. வெளிவந்த இரண்டுமே personally  அவருடைய master pieces  என்றுதான் சொல்லுவேன்.

சோச்சா நா தா  (2005)

  ”நினைத்தும் பார்க்கவில்லை” என்று ராவாக மொழிபெயர்க்கலாம். ஆனால் அலைபாயுதே என்று தைரியமாக இந்த திரைப்படத்திற்கு தலைப்பு வைத்திருந்திருக்கலாம். எல்லோருடைய கதையிலும், திரைக்கதையில்தான் ட்விஸ்ட் வைப்பார்கள் / இருக்கும். ஆனால் இந்த க்தையின் நாயகன் விரேனுக்கு (viren –abhay deol) மனதில் ஏற்படும் திருப்பங்களுக்கு அளவே இல்லை.

socha na tha

ஒரு பணக்கார குடும்பத்து இளைஞ்ன் விரேனுக்கு கிறுத்துவப்பெண் கரென்னுடன்(Karen – Apporva jha) காதல். அவளிடம் சொல்வதற்கு தயக்கம். விரேனின் குடும்பத்தினர் அவனை மற்றொரு பணக்கார அலையன்ஸாகிய அதிதியை (aditi – ayesha takia) மணக்க வற்புறுத்துகின்றனர். அதிதியுடனான பெண்பார்க்கும் படலத்தின்போடு தன் காதலைப்பற்றி விரேன் கூற தனக்கும் திருமணத்தில் நாட்டமில்லாததை அதிதியும் உரைக்க, விரேன் தனக்கு அதிதியை பிடிக்கவில்லை என்று கூறி இனிதே திருமணத்தினை நிறுத்தி விடுகிறான். இரண்டு குடும்பங்களுக்கிடையேயும் பகை. 

இதனிடையே விரேன், கரனிடம் தன் காதலை சொல்லி அவள் பச்சைக்கொடி காட்டுகிறாள். கரனின் குடும்பத்தாரும் அவர்களின் காதலுக்கு பச்சைக்கொடி காட்டுகின்றனர். ஆனால் விரேனின் குடுமத்தாருக்கு ஒரு கத்தோலிக்க மருமகள் வேண்டாம் என்ற பிடிவாதம். 

இந்த குழப்பங்களுக்கிடையே அதிதியுடனான பல சந்திப்புகளை மேற்கொள்ளுகிறான் விரேன்.  இரண்டு பேருக்கும் இடையே நட்பு சுடர்விட்டு எரிகிறது. இருவரும் தங்களுக்கிடையே உள்ள அன்னியோன்னியம், தடைகளற்ற பேச்சு சுதந்திரம் போன்றவற்றை கொண்டாடுகிறார்கள். 

இப்பொழுது அடுத்த U  ட்ர்னாக விரேனின் குடும்பத்தினர் கரனுடான விரேனின் காதலை அங்கீகரிக்கிறார்கள். இப்பொழுதுதான் விரேனுக்கு தான் உண்மையில் காதலிப்பது கரனை அல்ல அதிதியை என்று உரைக்க, முதலில் அதிதியே தனது காதலை எதிர்க்கிறாள். 

அதனைத்தொடர்ந்து வரும் சிக்கல்கள், சண்டைகள் யாவற்றையும் கடந்து அதிதி விரேன் சேர்ந்தனரா என்பது climax. 

மேலோட்டமாக பார்த்தால் எந்த  ஸ்திரத்தன்மையும் இல்லாத கதாபாத்திரங்கள் மீது கடுமையான கோபமும் நிராகரிக்கிற உணர்வும்தான் மேலோங்கி இருக்கும். ஆனால் இதற்காக இம்தியாஸ் அலி உருவாக்கியிருக்கிற அழகான பல காட்சியமைப்புக்களுடன் கூடிய திரைக்கதை கண்டிப்பாக பாராட்டத்தக்கது. 

அபே தியோலுக்கு இது முதல் படம். ஆஹா ஓஹோ என்றில்லாவிட்டாலும் நன்றாகவே நடித்திருக்கிறார். ஆயிஷாவும்தான். 

ஒரு ப்டத்தின் சிறந்த பாடலை கிளைமாக்ஸ் முடிந்த பிறகு வைக்கிற தைரியம் எத்தனை டைரக்டர்களுக்கு வரும். படம் முடிந்து வருகிற சோனு நிகாம், சஞ்சீவினி பாடிய “யாரா ரப்” பாடலை கேட்டுவிட்டு பிறகு திரையை அணைக்கவும்.

 ஸ்ரீராம் ராகவனின் இரண்டு நேர்த்தியான த்ரில்லர்கள் என்னிடம் கேட்கப்படும் ஒரு கேள்விக்கான பதிலை எளிமையாக்கிவிடும். இந்தியாவின் சிறந்த இயக்குனர்கள் பெயர்கள் கேட்கப்படும்போது மறக்காமல் SR பெயரை எழுதிச் சென்றிடுவேன். இரண்டுமே எந்த காலத்திலும் reference ஆக வைத்துக்கொள்ளக்கூடிய சுவாரசியமான திரைக்கதைகள். பெரிய நடிகர்கள் இல்லாவிடினும், கமர்ஷியல் சாகசங்கள் இல்லாமலும், அந்தந்த நாட்களில் நடப்பு ட்ரெண்ட்களில் மாட்டிக்கொண்டு விழிபிதுங்காமலும்  தேர்ந்த திரைப்படங்களை வழங்கும் இயக்குனர்களில் ஸ்ரீராம்ராகவனுக்கும் இடம் உண்டு.

1) Johnny gaddar (2007)

அவரின் ‘ஜானி கதர்’ (jonny gaddar) தான் முதலில் நான் பார்த்தது. 2007 ல் வெளிவந்தது. அந்த வருடத்தின் முக்கிய திரைப்படங்களில் ஒன்றாக  கருதப்பட்டது. தாமதமாக 2008ன் மத்தியில்தான் பார்த்தேன். பிரபல எழுத்தாளர் ஹார்ட்லி சேஸ் பெயருக்கு நன்றி தெரிவித்துவிட்டு திரைப்படத்தை ஆரம்பிப்பவர் திரைப்படம் முடியும் வரையிலும் அதனை மறக்காமல் செயல்படுத்தியும்விட்டுச் சென்றிருக்கிறார்.

விக்ரம், ப்ரகாஷ், ஷார்துல்,ஷிவா,ஷேஷாத்ரி ஆகிய ஐவரும் வெவ்வேறு பின்னணி கொண்ட, குழுவாக இணைந்து செயல்படும் ஒரு திருட்டு கும்பல். (வேண்டாம் இவர்கள் கொஞ்சம் intellectual ஆக செயல்படுவதால்) ஒரு கேங் என்று சொல்வோம்.  திருட்டென்றால் சில்லரைகள் அல்ல. ஒரு வீட்டை உடைத்து, ஒரு பெரிய bank robbery அல்லது ராபின்ஹூட் தனமாய் கெட்டவனிடமிருந்து நல்லவனுகு money transfer என்ற சித்தாங்களெல்லாம் இல்லை. சற்றே புத்திசாலித்தனமாக யோசிக்கப்ப்ட்ட ஒரு சிறிய முதலீட்டின் பேரில் (ஆளுக்கு 5 லட்சம்) போட்டு ஒரு பெரிய மீனை சுருட்டும் திட்டம் (அதிகமில்லை gentlemen! 5 கோடி மட்டுமே) . 

மிகவும் தெளிவாக, பிசிறின்றி  தீட்டப்பட்ட திட்டத்தில் வெளியிலிருந்து யாரும் புகுந்து சொதப்பிவிட முடியாத, சற்றும் இடறாத smooth execution க்கான எல்லா ஏற்பாடுகளையும் முடித்திருக்கும்போது சற்றும் எதிர்பாரதவிதமாக அவர்களுக்குள்ளேயே முளைக்கும் ஒரு கறுப்பு ஆடுதான் படத்தின் இரண்டாவது ட்விஸ்ட். முதலாவது. அதனை படத்தை ஆரம்பிக்கும்போதே போகிற போக்கில் சொல்லி விட்டுப்போவார்.

 அதனைத்தொடர்ந்து climax  வரை தொடரும் அதிரடியான ட்விஸ்ட்டுகள்தான் இந்த அற்புதமான திரைக்கதையின் முதல் ஹீரோ. வேகம்,விவேகம் இரண்டும் இணைந்த பலமான திரைக்கதையை எழுதிவைத்துவிட்ட பிறகு நடிகர்களைப்பற்றியெல்லாம் அதிகம் கவலைப்பட வேண்டாம் என்று ஸ்ரீராம் ராகவன் நினைத்திருப்பதன் வினை இந்த படத்தின் முன்னணி நாயகனாக இருக்கும் நீல் நிதின் முகேஷ் (இவ்வளவு பெரிய screen name?)  சற்றும் பொருந்தாத அல்லது அதிகம் வேலை வாங்கப்பட்ட முகபாவங்களுடன் படம் முழுவதும் வலம் வந்திருக்கிறார்.

தர்மேந்திராவின் நிறைய திரைப்படங்களை பார்த்ததில்லை. ஆனால் நான் பார்த்த வரையில் அவர் சற்றே ஒவர் ஆக்டிங் செய்பவர் என்ற எண்ணம் என்னில் உண்டு. (லைப் இன் அ மெட்ரோ உட்பட..) ஆனால் இந்த திரைப்படத்தில் பக்குவப்பட்ட கதாபாத்திரத்தில் மிகவும் சிறப்பான நடிப்பை வெளிப்படுத்தியிருக்கிறார்.  

வினாயக் பதக்கை யாரேனும் சிறிய கதாபாத்திரத்தில் நடிக்க வைத்திருந்தால் அவர்களுக்கு நரகம் கிடைக்க வேண்டும் என்ற எனது வேண்டுதலை கடவுள் ஸ்ரீராம் ராகவனுக்கு மட்டும் சற்றே தளர்த்திக்கொள்ளட்டும். 

இவர்களைத்தாண்டி ரிமிசென், தயாஷெட்டி, சாகீர் ஹுசைன், கோவிந்த் நமீடோ ஆகீயோரும் பட்டியலில் உண்டு. அவசியம் தவறவிடக்கூடாத திரைப்படங்களும் ஒன்று. 

2) Ek Hasina thi ( ஒரு அழகி இருந்தாள்) 

EHT பற்றி நிறையவே experts பேசக்கேட்டிருக்கிறேன். ஆனால் பார்க்கும் வாய்ப்பு வரவில்லை. Zee premiere சானலில் வாரம்தோறும் இதனை போட்டுக்கொண்டுதானிருக்கிறார்கள். எனினும் முழுமையாக பார்க்கும் ஆவலில் பெரும்பாலும் அவற்றினை தவறவிட்டிருக்கின்றேன். சென்ற மாதத்தின் ஒரு பின்னிரவில் முழுமையாக பார்த்து முடித்தேன்.

ஒரு சாதாரண பெருநகர மிடில்கிளாஸ் பெண்ணின் மீது சற்றும் எதிர்பாராத வகையில் திணிக்கப்படும் underworld  குற்றப்பிண்ணனியை தனது காதலனுக்காக அவள் ஏற்றுக்கொண்டு சிறைக்கு செல்வதும், காதலே பொய் என்று தெரிந்துவுடன் அவனை உறவாடிக்கொல்வதும் என லேசான கதைதான் என்றாலும் மிகச்சிறந்த execution அதனை எல்லாவற்றிலும் வித்தியாசமான திரைப்படமாகச் செய்துவிட்டிருக்கிறது. 

சிறந்த ஒளிப்பதிவு (முரளிதரன்) மற்றும் பின்னணி இசை (துவாரக்) ஆகிய இரண்டும் வலுவான திரைக்கதைக்கு சிறப்பான தூண்கள். சைஃப் அலி கான் மற்றும் ஊர்மிளா ஆகிய இருவருக்குமே சிறப்பான performance வழங்கும் அனைத்து வாய்ப்புகளையும் வழங்கியிருக்கின்றனர். 

ஏதேனும் ஒரு நாள் நீங்கள் zee network ன் ஏதேனும் ஒரு சானலை கடந்து செல்லும்போது ஏக் ஹசீனா தீ ஓடிக்கொண்டிருந்தால் அவசியம் பாருங்கள்.

‘பேபல் திரைப்படத்தின் டிவிடி என்னிடம் இருக்கிறது. இருக்கிறது’, என்கிற பிரயோகம் இருந்தது என்று ஆகிப்போகும் அளவிற்கு அதன் தேய்மானம் குறைந்துகொண்டே போகின்றது. என் மனதுக்கு மிக நெருக்கமான திரைப்படங்களில் பேபல் ஒரு முக்கியமான இடம் வகிக்கிறது. அதனைப்பற்றி எழுதும் அளவிற்கு என்னிடம் திறமை இல்லை என்பதை அறிவேன் ஆயினும் ஆர்வமெனும் பெருநெருப்பினை அணைக்கும் ஒரு சிறுநீர்த்துளியாகவே இதனை எண்ணிக்கொள்வேன்.

பைபிள் கதை ஒன்று உண்டாம். மொழிகளும், இனங்களும் பிறவாத காலத்தில் நிகழ்ந்த கதை அது, அகந்தையின் காரணமாக கடவுளுக்கே சவால் விடும் வண்ணம் விண்ணை முட்டி சொர்கத்தை அடையும் விதமாக கோபுரம் ஒன்றினை எழுப்ப முடிவு செய்கிறது மனிதகுலம். அதுதான் Tower of Babel . [Tower of Babel (Genesis 11:1-9)]. கோபம் கொண்ட கடவுள் மனித குலத்தினை பிரிக்கும் வண்ணமாய் வெவ்வேறு மொழிகளையும் இனங்களையும் உருவாக்கி உலகெங்கிலும் மனிதனை பல்வேறு இடங்களில் பரவ செய்வதாக சொல்கிறது அந்த கதை. ஆக மனிதனின் தவறு, கடவுளின் கோபம்தான் உலகமயமாக்கலின் முதல் வித்து என இந்த பைபிள் கதை நமக்கு உணர்த்துகிறது.

அதே போலதான் இந்த கதையில் ஒரு அமெரிக்க துப்பாக்கி, ஜப்பானிய பயணியின் வாயிலாக ஒரு மொரோக்கோ விவசாயிக்கு விற்கப்படுகிறது. அதனைத் தொடர்ந்து நிகழும் சம்பவங்களில் உலகமெங்கிலும் வெவ்வேறு நாடுகளில் வசிக்கும் நான்கு குடும்பங்கள் உருக்குலைகின்றன.

கேயாஸ் தியரியினை அடிப்படைப்படையாகக் கொண்டு பின்னப்பட்ட மிகச்சிறந்த திரைக்கதை பார்வையாளனை எங்கெங்கோ நிகழும் நான்கு வித்தியாசமான சம்பவங்களின் கோர்வை ஒரு மையப்புள்ளியினை சுற்றி சுழல்கிறது. நான்கு பிரிவுகளாக தொடங்கும் திரைக்கதை நான்கு பிரிவுகளையும் ஒட்டவைத்து அர்த்தம் புரிந்துகொள்ளும் வேலையை பார்வையாளனிடமே விட்டுவிட்டு தன் போக்கிற்கு நகர்கிறது. மொரொக்காவில் பெயர் தெரியாத ஒதுக்குப்புறமான ஒரு கிராமத்தில் – சொல்லப்போனால் அது கிராமமே இல்லை. மலை மேலுள்ள தனியான ஒரு வீடு 5 உறுப்பினர்களைக்கொண்ட ஒரே ஒரு வீடு அவ்வளவுதான். அந்த வீட்டில் 500 திர்ஹாம்களும் ஒரு ஆடும் கொடுத்து ஆடுகளைக்கொல்லும் ஒநாய்களை வேட்டையாடுவதற்காக ஒரு துப்பாக்கி விற்பனையில் துவங்குகிறது திரைப்படம். தனது சகோதரி குளிக்கும்போது துவாரம் வழி பார்க்கிற, வெயில் சுட்டெரிக்கும் மதியத்தில் சுயமைதுனம் செய்கிற, முதன் முறையிலேயே துப்பாக்கியால் இலக்கினை மிகச்சரியாக குறிபார்த்து சுடுகிற என வித்தியாசமான நடவடிக்கைகள் கொண்ட இளைய சகோதரன் யூசுப். அவன் செயல்களின் பால் பொறாமை கொண்டு அவனை கண்டிக்கிற மூத்த சகோதரன் அப்துல்லா. இவர்களின் துப்பாக்கியை கொடுத்து ஓநாய்களைக்கொல்லும் பொறுப்பை ஒப்படைத்துவிட்டு வேலைக்கு செல்கிறார் தந்தை. 3 கிலோமீட்டர்கள் பாய்ந்துசென்றும் தாக்கும் வல்லமை உள்ள துப்பாக்கி என்பதில் மூத்த சகோதரனுக்கு சந்தேகம். இளையவனுக்கோ மூத்தவனுக்கு சுடத்தெரியவில்லை என்ற எண்ணத்தில் அதனை பரிட்சித்துப்பார்க்க தொலைவில் வரும் ஒரு பேருந்தை நோக்கி சுடுகிறான். முதலில் எந்த மாற்றமும் தெரியாமல் வந்துகொண்டிருந்த பேருந்து சில நொடிகள் தாமதித்து சில பதற்றக்குரல்களுடன் நிற்கிறது. விபரீதம் உணர்ந்து அந்த இடத்திலிருந்து ஓடத்தொடங்குகின்றனர்.

அமெரிக்காவின் பெயர் சொல்லப்படாத மாகாணம். இரண்டு சிறு குழந்தைகள் ஓடிப்பிடித்து விளையாடிக்கொண்டிருக்கின்றனர் தங்களது இல்லத்தில். அவர்களின் பெற்றோர்கள் அந்த இல்லத்தில் இல்லை. அந்த குழந்தைகளை பார்த்துக்கொள்ளும் பொறுப்பினை ஏற்றிருக்கும் பணிப்பெண் அவர்களுக்கு கதை சொல்லி தூங்கவைக்கிறார். அந்த குழந்தைகளின் தந்தை தொலைபேசி நலன் விசாரிக்கிறார். அவர் மனைவிக்கு ஏதோ பிரச்சனை என்று அவர்களின் உரையாடலிலிருந்து உணர்ந்து கொள்ள முடிகிறது. பணிப்பெண் அவரை கவலையில்லாது இருக்குமாறும் தான் பார்த்துக்கொள்வதாகவும் தெரிவித்து விட்டு, தனது மகனின் திருமணத்திற்கென ஒரு நாள் விடுமுறையும் கேட்கிறாள். அதனை நிதர்சனமாக மறுத்துவிடுகிற அந்த குடும்பத் தலைவர் குழந்தகளை பத்திரமாக பார்த்துக்கொள்ளும்படி பணிக்கிறார்.

இரண்டு தம்பதிகள். மொரக்கோ பாலைவனத்தில் உல்லாசப்பயணம் மேற்கொண்டுள்ள குழுவில் பயணித்துக்கொண்டிருக்கின்றனர். அவர்களது மணவாழ்க்கை அமைதியாக இல்லை எனவும், அவர்கள் இரண்டு பேரிடையே சொல்லவொணாத்துயரம் ஒன்று குடிகொண்டுள்ளதையும் அவர்களின் பேச்சினூடாக உணர முடிகின்றது. அமைதியில்லாத அவர்கள்து மண வாழ்க்கையில் அமைதி துளிர்விடவே அந்த கணவன் அந்த உல்லாசப்பயணத்திற்கு ஏற்பாடு செய்திருப்பதையும் அறிகிறோம். மிகவும் பாதுகாப்பின்மையை உணரும் அவனது மனைவியோ அமைதியில்லாது தவித்துக்கொண்டிருக்கிறாள். பிரயாணத்தினிடையே எங்கிருந்தோ சாளரம் வழியே பாய்ந்து வந்த குண்டொன்று அவள் தோளினை தைக்க ரத்த வெள்ளத்தில் மிதக்கிறாள். செய்வதறியாது தவிக்கிறான் கணவன்.

ஜப்பான். டோக்கியோ நகரம். வாய்பேசமுடியாத,காதுகேளாத பெண்ணொருத்தி. தனது தந்தை மீதும், தன்னை புறக்கணிக்கும் சமூகத்தின் மீதும் கோபம் கொண்டு நிகழ்த்தும் சில செய்கைகளைக் காண்கிறோம். அதுவும் அவளின் பாலுணர்வுக்கு தீனி போடும் செய்கைகள். உள்ளாடை அணியாமல் பொதுவிடங்களின் அலைவதும், பரிசோதனைக்கு சென்ற இடத்தில் ஒரு பல் மருத்துவனை படுக்கைக்கு அழைப்பதுமாய். அவள் அம்மா தற்கொலை செய்துகொண்டது அவளை மன ரீதியாக பெரிதும் பாதித்திருக்கிறது என்பதனை தொடர்ந்து வரும் காட்சிகளில் உணர்ந்துகொள்கிறோம்.

இவ்விதமாய் தொடங்குகிற நான்கு விதமான பார்வைகளுடன் தொடர்கிறது திரைப்படம். மொராக்கோ சகோதரர்கள் எதேச்சையாக செய்யும் தவறு அவர்கள் குடும்பம் உட்பட மொத்தம் நான்கு குடும்பங்களின் வீழ்ச்சிக்கு எவ்வாறு காரணமாகிறது என்பதுதான் ஒன்லைனர்.

கோர்வையற்ற காட்சிகள் (Non-linerar narration) தான் என்றாலும் மைய முடிச்சை நழுவ விடாத திரைக்கதை விதிகள்தான் இந்த திரைக்கதையின் சிறப்பம்சம்.இதில் நடித்திருக்கும் நடிகர்களைப்பற்றி கூற வேண்டும். அனைவருமே சிறப்பான தேர்வுகள்தான் என்றாலும் என் மனதுக்கு ஒத்த பாத்திரங்களாத மொராக்கோ இளைய சகோதரனும், ஜப்பானிய காதுகேளாத,பேசமுடியாத பெண்ணும்தான். மிக அரிய சிறந்த performance அவர்களுடையது. அவர்கள் நடித்திருக்கும் வேறு பாத்திரங்களையும் பார்க்க பெறும் ஆவல் கொண்டிருக்கிறேன். இத்திரைப்படத்தில் பிராட் பிட் நடித்திருக்கிறார்- சிறப்பாக என்றாலும் அவரையும் தாண்டிய திரைக்கதை, அவர் நடிப்பையும் விஞ்சுகிற மற்ற கதாபாத்திரங்களின் அழகியல் போன்றவை இதனை Brad Pitt திரைப்படம் என்கிற வாதத்திலிருந்து சற்றே நகர்ந்துதான் நிற்க வேண்டியிருக்கிறது.

எத்தனை முறை பார்த்தாலும் அலுக்காத திரைப்படம் babel எனக்கு. ஒருமுறையேனும் கண்டிப்பாக பார்க்க வேண்டிய திரைக்கதை அனைவருக்குமே.!

Direction : Alejandro González Iñárritu
Starring : Brad Pitt, Cate Blanchett, Gael Garcia Bernal, Koji Yakusho and Adriana Barraza